කෝච්චිය මග හැරුණු හවසක
අ‌නෙක එනතුරු පැයක් විය තව
අසල වීදියක් දිගේ උඩහට
ඇවිද ගියෙමි, කාලේ ගෙවුමට ...
එක් මිනිසෙකු ගේ
පිළිරුවක හෙවනක
තවත් මිනිසෙක් වේ ය හිගමනක...
සුපර් මාර්කට් දොරක් අබියස
ගැහැණියක් වෙයි
වේළුණු පලා මිට "විස්සට'' විකුණන...
වංගුවක් හැරුණු විට, හාදයෙක් විය
සූරපු ලොතරැයි පිරුණු බක්කි
ලොරියට පටවන ....
උඩ සාක්කුව දෙසින් මොරගෑ
දුරකථනය ,
- අප්පච්චි එනවිට
අලුත් පොතක් කියවන්නට
ගේන ලෙසින් පොඩි දූට -
පණිවිඩයක් සටහන් විය...
අදට පොත පසකින් තියා
කියන්නම් මම අලුත් කතාවක්
වීීදියක් කියූ කතාවක්
දුත් දත යුතුම කතාවක්...
✍ සදුනි වනසිංහ
No comments:
Post a Comment