අහම්බෙන් ලදිමි

පාවෙනා නුහුලක්

අල්ලා බැදගතිමි

වෙර දරා දෙපොටක්..

 

සර්ව පිත්තල අහසක්

කපා මට්ටම් කලෙමි වරුවක්

දිලිසුනා විරූපී ම තරුවක්.....

හිනැහුනා වැහිබර ව වලාවක්

 

කෝපි රස හවසක්

ලුණු දාපු රහසක්

මගහැරුණු කවියක්

නුඹ නම්, ආලයට විරිතක් ....

✍සදුනි වනසිංහ

 

 

තිත්තම තිත්ත අඹයක්

පදමට ලුණුත් ඩිංගක්

කටගැස්මට මිරිස් වඩියක්

උඹ නම් , නෙල්ලි රහ කවියක්

 

සීතලම සීතල වතුරක්

හාදු දෙන ඉවුරක්

මගරකින පවුරක්

උඹ නම්  , ගලා යන වතුරක්

 

කළුම කළු අහසක්

පාට සව් කොලයක්

අටපට්ටම් හැඩයක්

උඹ නම් , නූල් නැති සරුංගලයක්.

 ✍ සදුනි වනසිංහ

අතරමග

 කෝච්චිය මග හැරුණු  හවසක 

අ‌නෙක එනතුරු පැයක් විය තව

අසල වීදියක් දිගේ උඩහට

ඇවිද ගියෙමි, කාලේ ගෙවුමට ...

එක් මිනිසෙකු ගේ 

පිළිරුවක හෙවනක 

තවත් මිනිසෙක් ‌‌‌වේ ය හිගමනක...

සුපර් මාර්කට් දොරක් අබියස

ගැහැණියක් වෙයි 

වේළුණු පලා මිට "විස්සට''  විකුණන...

වංගුවක් හැරුණු විට,  හාදයෙක් විය 

සූරපු ලොතරැයි පිරුණු බක්කි

ලොරියට පටවන ....

උඩ සාක්කුව දෙසින් ‌මොරගෑ

දුරකථනය ,

- අප්පච්චි එනවිට

අලුත් පොතක් කියවන්නට

ගේන ලෙසින් පොඩි දූට -

පණිවිඩයක් සටහන් විය...

අදට ‌‌පොත පසකින් තියා 

කියන්නම් මම අලුත් කතාවක් 

වීීදියක් කියූ කතාවක් 

දුත් දත යුතුම කතාවක්... 

✍ සදුනි වනසිංහ